要數香港人最鍾意去嘅旅行國家，當然就係日本！而日本東京都係熱門旅遊城市之一，今次為大家揀選左十個熱門東京景點，打造成東京自由行攻略2023，無論新手老手都一樣可以參考！全文東京景點附門票連結同門票價錢，立即睇晒重要資訊計劃東京之旅！想比較大阪景點同東京景點，可以睇埋 大阪自由行攻略 2023
- 東京華納兄弟哈利波特影城
- 東京迪士尼
- 豐洲 teamLab Planets TOKYO
- 東京三鷹之森吉卜力美術館
- 井之頭恩賜公園
- 江戶東京建築園
- 輕井澤
- 東京涉谷SHIBUYA SKY
- 東京晴空塔
- 明治神宮
1. 東京華納兄弟哈利波特影城
繼倫敦第一座哈利波特影城後，全世界第二座今年喺東京開幕啦！呢個神奇而獨特的「哈利波特片場」將會一比一復刻《哈利波特：神秘的魔法石》到《怪獸與牠們的產地》系列中服裝同道具，係英國哈利波特片場嘅美術道具、光影收音、道具模型以及服飾擺設都會有。影城分為室內「Sound Stage」及戶外拍攝「Backlot」兩大區域，總面積約達3萬平方公尺，並會有日文專業解說導覽。
如果你係哈利波特忠實粉絲，或者單純想沈浸式體驗一下哈利波特嘅拍攝現場，咁就一定唔可以錯過呢個機會！門票好快就賣晒，建議計劃去日本嘅朋友去Klook預購門票先。
| 門票種類 | 費用 |
| 成人 | $353 |
| 青年(12-17歲) | $291 |
| 兒童(4-11歲) | $213 |
*價錢以 Klook官網 為準
立即預訂
2. 東京迪士尼
世界各地都設有迪士尼，但佢地每一個都唔一樣，主題城堡的卡通原型唔一樣，公園入面的主題遊樂設施都會有一些差距。最大的區別在於，每個迪士尼公園的遊行同表演都是為個個公園量身定做的。推薦入住東京迪士尼直營酒店或公認酒店，只要去到JR舞濱站，旁邊就有迪士尼迎賓中心可以check in，而且玩完睇完煙花，亦可以直接返酒店休息，非常方便！另一樣要注意係建議出發前先下載好東京迪士尼度假區 App，因為DPA(迪士尼尊享卡)同Standby pass(預約等候卡)都要喺APP上購買同預約，而且APP入面亦可以睇到自己定位、預約餐廳同遊樂設施嘅等候時間，所以一早準備好就萬無一失！
2023年迪士尼歡慶100週年，而「日本東京迪士尼樂園」都40週年啦！為左慶祝40週年，2023年4月15日到2024年3月31日期間會以「Dream-Go-Round」主題裝飾樂園，亦推出左好多限定活動同商品，迪士尼嘅粉絲絕對唔可以錯過！門票可以到KKday預購，15日前可以免費取消。
| 門票種類 | 費用 |
| 成人 | $470起 |
| 青年(12-17歲) | $392起 |
| 兒童(4-11歲) | $280起 |
*價錢以 KKday官網 為準
立即預訂3. 豐洲 teamLab Planets TOKYO
豐洲 teamLab以沈浸式體驗而變成熱門景點，將身體同藝術作品的界線拉近。全個設施分為「Water Area」、「Garden Area」同「Public Area」三區。要注意入展館參觀需要除鞋，同埋某啲展區會以鏡面作地板，女生參觀建議著褲，避免走光。
Water Area 展區就係熱門影相嘅展區，其中最多人打卡嘅就係「無窮無盡的水晶空間」，由鏡同光點打造出黎嘅無盡空間，就算影片或影相都有一種無盡嘅宇宙感。而另一個「錦鯉與人共舞所描繪之水面圖」就係融入水中的，係由電腦程序實時呈現嘅互動式藝術品，當你碰到錦鋰後，錦鋰會變成花瓣散開，好似一幅識郁嘅水彩畫咁。
Garden Area中「漂浮花園」裡面含有1 萬 4 千朵真蘭花，靠近蘭花時會自動上升，感覺好似有個私人花園圍住你咁，影相效果好有仙氣！想預先購票嘅朋友可以到KKday預訂，入場時出示QR code就可以。
*價錢以 KKday官網 為準
立即預訂4. 東京三鷹之森吉卜力美術館
相信無論大人定小朋友都睇過宮崎駿大師嘅作品，都對裡面場景同人物有好深印象。而三鷹之森吉卜力美術館就係一個打造得好似入咗動畫世界嘅空間，仲可以親眼見證經典動畫的製作過程。
走入歐式鐵門後，第一個見到嘅就係好多人打卡熱門地點 — 巨大龍貓。美術館係由地下一層、地上兩層共三層樓，同屋頂庭園所組成。除左充滿動畫氣息嘅室內外設計，仲可以憑門票觀賞美術館專有嘅動畫電影。美術館常設展示室「動畫工作室」完美重現左吉卜力工作室當年嘅工作環境同宮崎駿大師構思動畫嘅工作室，仲可以欣賞唔少嘅手繪同動畫製作工具。
想去嘅朋友記住一早預購門票，因為門票好搶手，每個月日本時間上午10點開放下個月嘅門票。除左可以喺LAWSON購票，唔識日本嘅朋友都可以到KKday訂飛。
*價錢以 KKday官網 為準
立即預訂5. 井之頭恩賜公園
井之頭恩賜公園曾經係江戶幕府同日本皇室的御用林，1917年東京政府整理開放後成為日本第一座郊外公園，亦都成為櫻花季中其中一個熱門賞櫻地點！公園入面除咗散步外，仲可以坐天鵝船、參拜神社同食野等等。而且三鷹之森吉卜力美術館就喺公園嘅西側，最適合編入一日遊嘅景點之一！
公園正前方就係七井橋，走到橋上就會到划船場。時限有30分、60分兩種。如果唔划船，都可以選擇環繞井之頭恩寺公園行一圈，或者揀個櫻花樹，係下面野餐。
從划船場反方向行去，就會到祭拜弁才天的神社，呢位女神代表住學術、藝術、財富同結緣，如果誠心參拜的話，都可以獲得祝福同保佑哦！
6. 江戶東京建築園
相信有唔少人係宮崎駿嘅粉絲，而呢個景點就係電影《千與千尋》中鍋爐爺爺工作地方嘅靈感來源地方 — 江戶東京建築園。去三鷹之森嘅朋友，可以考慮將呢個景點都編排入行程！呢到保留左當時民宅同名望人士嘅住宅，想感受到《千與千尋》嘅氣息或者了解江戶至昭和時代東京人生活風貌，來一個「宮崎駿日」。
睇落咁有古色古香嘅博物館，其實係於1993年建造。雖然同2023年只係相差30年，但就保存左數百年歷史建築。參觀嘅人可以了解到當時嘅居住環境同生活習慣。除左有遺跡同建築外，亦會舉辦季節性嘅活動，出發前可以先參考 活動日程。
博物館分為三個區，分別係西區、中央區同東區，設有唔同嘅住宅、商店同餐廳。好適合漫步感受古代氣息後，慢慢享受美食嘅地方。
由三鷹之森出發只要45分鐘就到達，搭車去到武藏小金井站，車站北口就有乘搭往小金井公園西口嘅巴士。落車後只要行入公園，沿住路牌走5分鐘就到入口。對地點或者交通工具迷惘嘅朋友可以到官網參考，入面已經有齊巴士時間表同相片帶你去！參考官網
*價錢以 江戶東京建築園 為準
7. 輕井澤
位於長野縣嘅輕井澤係日本其中一個出名嘅高山度假勝地，唔想留喺擠迫嘅城市，可以選擇遠離煩囂，到輕井澤享受輕鬆一日遊！由東京站搭北陸新幹線只需1個鐘，去到除咗可以選擇搭巴士遊輕井澤外，踩單車亦都係遊客首選。輕井澤觀光區域分為輕井澤車站周邊、舊輕井澤、中輕井澤、北輕井澤同南輕井澤，一般一日遊、兩日遊只會停留輕井澤車站周邊、舊輕井澤、中輕井澤。
踩單車嘅途中，可以見到一片樹木同林間小木屋，大約15分鐘之後就會抵達輕井澤第一站 — 雲場池。雲場池又名天鵝湖，天然嘅湖泊公園絕對可以令你放鬆心情。伴住旁邊有散步道，行晒只需20分鐘。如果想再繼續欣賞美景放鬆下，可以喺旁邊嘅Cafe休息下都唔錯！想睇紅葉景色嘅建議十月下旬到十一月上旬去，如果想睇雪景可以選擇冬天去。
再下個景點係舊輕井澤銀座商店街，成條街被歐式矮房圍住同舖上古色古風嘅紅磚道。商店街亦都有好多手信、手工果醬、咖啡店等其他商店，有一種歐洲手創市集嘅風味。
呢個時候如果開始肚餓的話，就可以去王子購物廣場OUTLET享用美食同購物，仲可以喺嗰度欣賞到夕陽美景。
想參加一日遊嘅朋友亦可以選擇去KKday預訂，依家仲有限時5折優惠！
| 門票種類 | 費用 |
| 輕井澤一日遊 | $305起 / 每人 |
*價錢以 KKday官網 為準
立即預訂8. 東京涉谷SHIBUYA SKY
2019年11月開幕嘅Shibuya Scramble Square係涉谷最新地標，SHIBUYA SKY天台展望台立即成為旅客嘅熱門打卡點！可以高空俯瞰涉谷十字路口，360度飽覽東京晴空塔、東京鐵塔等景色，天氣晴朗時候仲可以睇到富士山。
要打打卡嘅一定唔可以錯過Sky Edge，360度全透明玻璃，天氣好時仲有自然太陽光，影人像相或風景相都一流！第二個就係通往頂層，由46層到47層嘅扶手電梯，透過透明玻璃窗欣賞涉谷街景，相信大家已經睇過唔少呢個景點嘅靚片。除此之外，仲有係Sky Edge後面的Geo Compass同Sky stage大草坪。
門票方面雖然可以即場買，但係最搶手嘅黃昏時段就好快賣晒！難得去到日本東京，想欣賞東京黃昏美景同影輯靚相，記住預購門票。門票方面可以去Klook買，入場時出示QR code就可以入場啦！
*價錢以 Klook官網 為準
立即預訂9. 東京晴空塔
就算你無去過東京，都一定有聽過晴空塔呢個地標，晴空塔又名東京天空樹，係全世界第三高嘅人工構造物。除咗可以上去欣賞東京景色外，晴空塔更加係一個購物商場同水族館！
如果想俯瞰東京市景，可以到350樓嘅「天望甲板」，透過大型玻璃可以360度欣賞關東景色，包括東京鐵塔、隅田公園、淺草寺，富士山等等。大膽嘅你，都可以到340樓企喺透明玻璃上面感受下懸空嘅感覺。再上去450公尺嘅「天望回廊」，而4月20至7月19日期間，為左歡慶迪士尼100周年，館內都用迪士尼同Pixar人氣卡通人物裝飾，欣賞美景之餘，仲可以買限定手信留念。
欣賞完美景可以落到商場繼續購物，亦都有各式各樣餐廳可以選擇。想繼續玩嘅朋友可以到水族館睇企鵝，將一日嘅行程排滿佢！無論晴空塔嘅天望甲板或者水族館，都可以透過Klook就可以買到飛啦，可以揀選門票或套票。
| 門票種類 | 成人 | 青年(12-17歲) | 兒童(6-11歲) |
| 天望甲板 (350米) | $101起 | $78起 | $48起 |
| 天望甲板 + 天望迴廊 | $151起 | $120起 | $73起 |
*價錢以 Klook官網 為準
立即預訂10. 明治神宮
明治神宮係小編私心推介景點，最主要佢只係原宿駅出口旁邊，而且亦係免費！一出原宿駅西口出口，就會望到第一個鳥居。入到去會沿住佈滿「玉砂利」嘅參道，入面寧靜感覺同原宿或表參道嘅熱鬧成好大對比。其中一個好值得打卡嘅位就係酒牆，一邊係清酒牆，而另一邊係裝喺橡木桶嘅葡萄酒牆。
再沿住行入去就會到達明治神宮正殿廣場，兩邊有兩棵大樹。其中一棵樹係比你掛寫上願望嘅繪馬，而另一棵係「夫婦楠」，兩棵樹嘅樹幹被連繩綁住，代表住明治皇帝夫妻之間嘅和諧關系，亦都係求姻緣或夫婦和順嘅熱門地點。
參觀完正殿嘅朋友，亦可以跟住路牌指示繼續前往北邊嘅寶物殿，沿住道路走入一大片樹林，去參觀歷代天皇嘅畫像同文物。由進入明治神宮開始，就會聽到烏鴉嘅叫聲，怕雀鳥嘅朋友可能要注意。
最後打算去原宿或表參道嘅朋友，去返原宿駅西口時會見到有咖啡廳，想休息一陣放鬆下都係唔錯嘅選擇。